काठमाडौं। जनकपुरमा छोरा नजन्माएको भन्दै श्रीमानले श्रीमतीको हत्या गरेका छन्। धनुषाको सबैला नगरपालिकामा एक श्रीमानले श्रीमतीको हत्या गरेको घटना सार्वजनिक भएको हो।

छोरा जन्माउन नसकेको भन्दै सबैला नगरपालिका ३ का ३५ वर्षीय लालबाबु साफीले ३० वर्षीया श्रीमती अजमेरी खातुनको घाँटी थिचेर हत्या गरेको मृतकका माइती पक्षको आरोप छ।

१३ वर्षअघि प्रेम विवाह गरेकी अजमेरीलाई लामो समयदेखि छोरा र दाईजोलाई लिएर साफी र उनका वहिनी नुरजहा खातुन, दाई मन्जुर साफीले मानसिक तनाव दिदै आएको खातुनका बुबा मोहम्मद आलमले बताए।

कार्तिक ८ गते राती रक्सी खाएर साफीले घरमा सुतिरहेका छोरीको घाँटी थिचेर हत्या गरेको उनको आरोप छ। मृतकको शरिरभरि डाम देखिएको र घाँटीमा समेत डाम देखिएको उनको भनाइ छ।

ईलका प्रहरी कार्यालय सबैलाका प्रहरी उपरीक्षक राजेश सिग्देलले घटनामा भएलगतै मृतकका श्रीमान लालबाबु साफीलाई नियन्त्रणमा लिई अनुसन्धान गरिरहेको बताए।