काठमाडौं । नेपाल चेम्बर अफ कमर्स र नेपाल मेडिसिटी अस्पतालबीच चेम्बरका पदाधिकारी, कर्मचारी, जिल्ला चेम्बरका सदस्य तथा उनीहरूका प्रत्यक्ष आश्रित परिवारलाई सहुलियतपूर्ण स्वास्थ्य सेवा उपलब्ध गराउने उद्देश्यले समझदारीपत्र (एमओयू) मा हस्ताक्षर भएको छ।

जमलस्थित चेम्बर भवनमा आयोजित कार्यक्रममा नेपाल चेम्बर अफ कमर्सका स्वास्थ्य समिति संयोजक मृगेन्द्र मेहर श्रेष्ठ र नेपाल मेडिसिटी अस्पतालका प्रमुख कार्यकारी अधिकृत डा. अमित तोमरले सम्झौतापत्रमा हस्ताक्षर गरेका हुन्।

एक वर्षका लागि लागू हुने उक्त सम्झौताअनुसार चेम्बरका कार्यसमिति सदस्य, कर्मचारी, जिल्ला चेम्बर सदस्य तथा उनीहरूका प्रत्यक्ष आश्रित परिवार (पति/पत्नी, बाबुआमा तथा २२ वर्षमुनिका दुई सन्तान) ले नेपाल मेडिसिटी अस्पतालमा उपचार गराउँदा विशेष स्वास्थ्य सेवा तथा विभिन्न सहुलियत प्राप्त गर्नेछन्।

सम्झौताअनुसार अस्पतालले भर्ना (इनपेसियन्ट) तथा बाह्यरोगी (आउटपेसियन्ट) सेवामा १० प्रतिशत छुट उपलब्ध गराउनेछ। तर औषधि, उपभोग्य सामग्री, इम्प्लान्ट, प्याकेज सेवा तथा बाह्य परीक्षणमा उक्त छुट लागू नहुने जनाइएको छ। साथै बीमामार्फत प्रत्यक्ष क्यासलेस सेवा प्राप्त गर्ने अवस्थामा पनि छुट सुविधा लागू नहुने व्यवस्था गरिएको छ।

सहकार्यअन्तर्गत नेपाल मेडिसिटीले चेम्बरका सदस्य तथा कर्मचारीहरूका लागि वर्षमा दुई पटक स्वास्थ्य सचेतना कार्यक्रम सञ्चालन गर्ने, बेसिक लाइफ सपोर्ट (बीएलएस) तालिम प्रदान गर्ने, विशेष स्वास्थ्य प्याकेज उपलब्ध गराउने तथा रक्तदान कार्यक्रम आयोजना गर्ने सहमति भएको छ। दुवै संस्थाले सेवा प्रवाह, समन्वय तथा सूचना आदानप्रदानका लागि सम्पर्क व्यक्ति तोक्ने तथा प्राप्त सूचनाको गोपनीयता कायम राख्ने प्रतिबद्धता समेत व्यक्त गरेका छन्।

कार्यक्रममा नेपाल चेम्बर अफ कमर्सका अध्यक्ष कमलेश कुमार अग्रवालले उक्त सहकार्यबाट चेम्बरका सदस्य, उनीहरूका परिवार तथा व्यवसायिक समुदायले गुणस्तरीय स्वास्थ्य सेवामा सहज पहुँच प्राप्त गर्ने विश्वास व्यक्त गरे। नियमित स्वास्थ्य परीक्षण, स्वास्थ्य सचेतना तथा निवारणमुखी स्वास्थ्य सेवाले स्वस्थ व्यवसायिक समुदाय निर्माणमा महत्वपूर्ण योगदान पुर्‍याउने उनको भनाइ थियो।

अध्यक्ष अग्रवालले चेम्बर र मेडिसिटीबीचको साझेदारीले सामाजिक उत्तरदायित्वलाई थप मजबुत बनाउँदै अन्य संस्थाका लागि पनि अनुकरणीय उदाहरण स्थापित गर्ने विश्वास व्यक्त गरे। उनले स्वास्थ्य र आर्थिक विकास एकअर्काका परिपूरक विषय भएको उल्लेख गर्दै स्वस्थ मानव संसाधन नै आर्थिक समृद्धिको आधार रहेको बताए।

त्यसै अवसरमा नेपाल मेडिसिटी अस्पतालका अध्यक्ष डा. उपेन्द्र महतोले नेपाल चेम्बर अफ कमर्स र नेपाल मेडिसिटी अस्पतालबीच भएको सहकार्य विगतदेखिको सम्बन्धको निरन्तरता भएको बताए।

उनले चेम्बरका सदस्य तथा व्यवसायीलाई अझ प्रभावकारी, सहज र गुणस्तरीय स्वास्थ्य सेवा उपलब्ध गराउने प्रतिबद्धता व्यक्त गर्दै यस प्रकारको सहकार्यले संस्थाप्रतिको जिम्मेवारी थप बढाएको उल्लेख गरे। स्वास्थ्य क्षेत्रको विकासका लागि सबै सरोकारवाला निकायले साझा प्रयास गर्नुपर्नेमा उनले जोड दिए।