काठमाडौं । अत्यधिक वर्षासँगै गएको पहिरोका कारण समुन्द्रटार–त्रिशूली ३बी १३२ केभी प्रसारण लाइनको टावर नम्बर ४१ क्षतिग्रस्त भएको छ।

टावरमा क्षति पुगेपछि प्रसारण लाइन प्रभावित बनेको हो । टावर क्षतिग्रस्त बनेसँगै सोही प्रसारण लाइनमार्फत राष्ट्रिय ग्रिडमा जोडिएका ११ मेगावाट क्षमताको सूर्यकुण्ड हाइड्रोपावर र ५ मेगावाट क्षमताको बुद्धभूमि हाइड्रोपावरको विद्युत प्रवाह पावर इभाकुएसनमा कठिनाइ उत्पन्न भएको छ ।

​यद्यपि, प्रसारण लाइनमा समस्या आए पनि उपभोक्ताहरूका लागि भने विद्युत आपूर्ति नरोकिने नेपाल विद्युुत प्राधिकरणले जनाएको छ ।

प्राविधिक टोलीले चौगाडा सबस्टेसनबाट वैकल्पिक व्यवस्था मिलाएर ग्राहकलाई निरन्तर बिजुली उपलब्ध गराइरहेको जानकारी दिएको छ। क्षतिग्रस्त टावरको मर्मत तथा सुदृढीकरणको काम छिट्टै अघि बढाइने बताइएको छ।