सर्वोच्च अदालतले क्रिकेटर सन्दीप लामिछानेलाई विदेश जाने अनुमति दिएको छ।

त्यसपछि न्यायाधीश सपना प्रधान मल्ल र कुमार चुँडालको संयुक्त इजलासबाट सन्दीपलाई राहत दिने गरी आदेश आएको हो।

सोमबार सन्दीपको तर्फबाट वरिष्ठ अधिवक्ता रमन श्रेष्ठ, अधिवक्ता सरोजकृष्ण घिमिरे, रोशनी पौडेल र रामेश्वर न्यौपानेले बहस गरेका थिए। 

सन्दीपलाई एकजना नाबालिग (गौशाला २६) लाई बलात्कार गरेको अभियोग लागेको थियो। त्यसपछि उनलाई जिल्ला अदालतले थुनामा पठाउन आदेश दिएको थियो।

जिल्लाको उक्त आदेशविरुद्ध सन्दीप उच्च अदालत पाटन गएका थिए। जहाँ गत पुस २८ गते उच्च अदालतले सन्दीपलाई थुनाबाट रिहा गर्न आदेश दिएको थियो।

उक्त आदेशपछि उनी पुस २९ गते केन्द्रीय कारागारबाट रिहा भएर नेपाली राष्ट्रिय क्रिकेट टोलीमा फर्किएका थिए। 

तर त्यसपछि सन्दीपलाई उच्च अदालत पाटनले काठमाडौं छाड्न पूर्वअनुमति लिनुपर्ने र विदेश जान नपाउने आदेश दिएको थियो।

त्यसविरुद्ध सन्दीप सर्वोच्च अदालत पुगेका थिए। उनले आफूलाई विदेश जान रोक लगाउने उच्च अदालतको आदेश बदर गर्न माग गरेका थिए।

सर्वोच्चमा बहस हुँदा नेपाली क्रिकेट टिमका व्यवस्थापक विनोद दास सर्वोच्चको बन्द इजलासमै पुगेर सन्दीपलाई विदेश लैजाँदा आफूले फर्काउने ग्यारेन्टी लिएका थिए।

क्यानले थाल्याे प्रकृया

यस्तै नेपाल क्रिकेट संघ क्यानले भने सनदीपलाई यूएई पठाउनका लागि पहल सुरु गरेको जनाएको छ । क्यानका अध्यक्ष चतुरबहादुर चन्दले ढिलागरि फैसला आएको र आईसीसीको नियमअनुसार निणर्य गर्ने बताए।

सन्दीपको ठाउँमा गएका खेलाडीको ठाउँमा सन्दीपलाई राख्नेगरि अनुरोध गर्ने उनको भनाई छ । सन्दीपलाई यूएईमा जारी सिरिज खेलाउनका लागि क्यानले कुनै कसर बाँकी नराख्ने समेत उनले स्पष्ट पारे ।