काठमाडौं । भारतको झारखण्डमा शनिबार भारी वर्षा भएको छ । वर्षाका कारण रामगढ जिल्लाको महुआ टाङ्ग्रीमा बिहान एक अवैध कोइला खानी भत्किएको छ । भारतीय सञ्चार माध्यमका अनुसार उक्त घटनामा चार जनाको मृत्यु भएको छ भने ४ जना घाइते भएका छन् ।

मध्य प्रदेशमा बलियो वर्षा प्रणाली सक्रिय भएका कारण बाढीको अवस्था आएको छ । भारी वर्षाका कारण मण्डला जिल्लामा नर्मदा नदीमा बाढी आएको छ । नरसिंहपुरबाट होशंगाबाद जोड्ने राष्ट्रिय राजमार्गमा रहेको पुल भत्किएको छ । २० जुनमा हिमाचल प्रदेशमा मनसुन प्रवेश गरेको थियो । त्यसयता जुलाई ४ सम्म बाढी–पहिरोका घटनामा ७५ जनाको मृत्यु भएको छ भने २८८ जना घाइते भएका छन् ।

बादल फुट्ने घटनामा सबैभन्दा बढी १४ जनाको मृत्यु मन्डी जिल्लामा भएको छ । यहाँ ३१ जना अझै बेपत्ता रहेका छन् । आज पनि राज्यमा भारी वर्षाको लागि रेड अलर्ट जारी गरिएको छ ।