काठमाडौं । नेपाल प्रहरीका केन्द्रीय प्रहरी प्रवक्ता प्रहरी नायव महानिरीक्षक (डिआइजी) अबि नारायण काफ्लेले विभिन्न प्रहरी कार्यालयका प्रवक्ता तथा सूचना अधिकारीहरूसँग मंगलबार भर्चुअल माध्यमबाट छलफल तथा अन्तरक्रिया गरेका छन् ।

नेपाल प्रहरी प्रधान कार्यालय काठमाडौंमा आयोजित कार्यक्रममा डिआइजी काफ्लेले पछिल्ले समय पत्रकार सम्मेलन तथा प्रेस विज्ञप्तिमा देखिने प्रवृत्ति, सूचनाको हकसम्बन्धी संवैधानिक व्यवस्था, सूचनाको हक सम्बन्धी ऐन, २०६४, सूचना प्रवाहका लागि नेपाल प्रहरीका आधिकारिक माध्यम, सञ्चारमाध्यम सम्बन्धी नीति, २०६० तथा सामाजिक सञ्जाल प्रयोगसम्बन्धी प्रावधानबारे सहभागी प्रहरी अधिकृतहरूलाई जानकारी गराएका थिए ।

डिआइजी काफ्लेले सूचना सम्प्रेषण प्रक्रिया, सूचनामा अपनाउनुपर्ने सतर्कता तथा समसामयिक विषयमा विस्तृत छलफल गरेका हुन् । उनले नेपाल प्रहरीले सञ्चारकर्मी तथा आम नागरिकलाई उपलब्ध गराउने सूचना सदैव सत्य, वस्तुनिष्ठ र पारदर्शी हुनुपर्ने बताए । साथै सामाजिक सञ्जालको प्रयोगमा विशेष सावधानी अपनाउन आग्रह गर्दै सकारात्मक सोच, जनविश्वास र संगठनप्रतिको भरोसा अभिवृद्धि हुने काम गर्न निर्देशन दिएका छन् ।

कार्यक्रममा काठमाडौं उपत्यका प्रहरी कार्यालय, काठमाडौं उपत्यका ट्राफिक प्रहरी कार्यालय, त्रिभुवन अन्तर्राष्ट्रिय विमानस्थल सुरक्षा कार्यालय तथा जिल्ला प्रहरी परिसरहरूका प्रवक्ता एवं सूचना अधिकारीहरूको उपस्थिति रहेको थियो ।