काठमाडौं । त्रिभुवन विश्वविद्यालयको उपकुलपतिमा प्राडा. भोला थापा नियुक्त भएका छन् । विश्वविद्यालयका कुलपति समेत रहेका प्रधानमन्त्री बालेन्द्र शाह (बालेन) ले थापालाई विहिबार उपकुलपतिमा नियुक्त गरेका हुन् ।

अघिल्ला सरकारको पालामा भएका सम्पूर्ण नियुक्ति अध्यादेशमार्फत खारेज भएसँगै त्रिवि लगायत अन्य सबै विश्वविद्यालयका तत्कालीन् उपकुलपति लगातका पदाधिकारी पदमुक्त भएका थिए । उनीहरु पदमुक्त भएसँगै सरकारको तत्कालको लागि अन्य व्यक्तिलाई जिम्मेवारी दिएको थियो ।

थापा काठमाडौं विश्वविद्यालय (केयु) का पूर्व उपकुलपति समेत हुन् । 

शिक्षा तथा खेलकुदमन्त्री सस्मित पोखरेलको संयोजकत्वमा रहेको उपकुलपति छनोट तथा सिफारिस समितिले उपकुलपति नियुक्तिको लागि थापासहित मध्यपश्चिम विश्वविद्यालयका पूर्व उपकुलपति प्राडा नन्दबहादुर सिंह र प्राडा दुर्गादत्त पौडेलको नाम सिफारिस गरेको थियो ।

सोही सिफारिसको आधारमा थापालाई नियुक्त गरिएको हो । यसअघि एक कार्यकल काठमाडौं विश्वविद्यालयको उपकुलपतिको कार्यकाल पुरा गरेका थापा दोस्रो कार्यकालको लागि पनि उपकुलपतिको प्रस्पिर्धी बनेका थिए । 

त्यतिबेला २०८१ साल फागुनमा काठमाडौं विश्वविद्यालयको उपकुलपति खोज तथा सिफारिस सम्बन्धी कार्यविधि अनुसार थापा उपकुलपतिको लागि १० जनासहितको संक्षिप्त सूचिमा पनि परेका थिए । 

तर, त्यतिबेला सोही विश्वविद्यालयका रजिष्ट्रार रहेका अच्युत वाग्लेलाई सरकारले उपकुलपति बनाएको थियो । उपकुलपति वाग्ले भने अहिले पदमुक्त बनिसकेका छन् ।

केयुमा दोस्रो कार्यकाल बिताउन नपाएपनि थापा अहिले त्रिविमा पहिलो र विश्वविद्यालयको उपकुलपतिको हैसियतले दोस्रो कार्यकालयको लागि नियुक्त भएका हुन् ।