व्यक्तिगत तहमा एमाले अध्यक्ष केपी ओली र एकीकृत समाजवादी अध्यक्ष माधव नेपालबीचको सम्बन्ध ठिक छैन । 

माओवादी केन्द्र अध्यक्ष पुष्पकमल दाहाल प्रचण्डसँग मेलमिलाप गरेर ओलीले प्रधानमन्त्री नै बनाइसकेपनि विगत एमालेमा एउटै मूहमा बसेका दुई नेता ओली र नेपाल मिल्न सकेका छैनन् ।

प्रधानमन्त्री प्रचण्डले सर्वदलीय बैठक थाल्दै आफूलाई विश्वासको मत दिएकामा सबै दललाई धन्यवाद दिए । आइन्दा पनि सहमतिबाटै अघि बढ्न आवश्यक रहेको भन्दै उनले कित्ताबन्दी नगर्न दलका नेताहरुलाई अनुरोध गरे । प्रचण्डले भने, ‘म एउटा गठबन्धनबाट प्रधानमन्त्री बनें, तर बाँकी पार्टीहरुप्रति पनि मेरो कहीँ न कहीँ दायित्व छ । आउनुहोस्, सहमतिबाटै राष्ट्रपति, उपराष्ट्रपति, सभामुखलगायत पदमा साझा दृष्टिकोण बनाऔं ।’

प्रचण्डले यो पनि भन्न छुटाएनन्, ‘एमालेसँग छलफल अघि बढिसकेको छ । त्यस अनुसार ती पदहरुमा उम्मेदवार आउनेछन् । तपाईंहरुले पनि त्यसै बमोजिम सदाशय राखिदिनुभयो भने अघि बढ्न सजिलो हुने थियो ।’

एमाले अध्यक्ष केपी ओलीले प्रचण्डको भनाइलाई अझै छोटो र सिधा सारांश खिचिदिए, ‘राष्ट्रपति को, सभामुख को भन्नेमा हामीले छलफल गरिसक्यौं । अब त्यसैमा कांग्रेस लगायत पार्टीहरु सहमत भए भने त सहमति भैगो नि ?’

ओलीले यसो भन्दैगर्दा बालुवाटारमा असन्तुष्टिको कानेखुसी दौडिएको थियो ।

आफ्नो पालोमा एकीकृत समाजवादी अध्यक्ष नेपाल ओलीतिर हेर्दै कड्किए, ‘तपाईंले जसो–जसो भन्नुहुन्छ, त्यसै–त्यसै मान्दै जाने हो भने त्यही हो सहमति ? हाम्रो काम चाहिँ तपार्इंले भनेको मान्दै जाने हो ?’

तर पछि आफ्नो बोल्ने पालोमा ओलीले नेपालको जिज्ञासा सम्बोधन गरेनन् । बरु कतिपयको पालो नआउँदै उनी उठेर गइसकेका थिए ।

त्याे क्रम त्यही राेकिएन। 

बैठकमा नेकपा एमालेकाअध्यक्ष केपी ओली र कांग्रेसका मुख्य सचेतक रमेश लेखकबीच भनाभन भएको छ । मंगलबार प्रधानमन्त्री पुष्पकमल दाहाल प्रचण्डले बोलाएको बैठकमा अध्यक्ष ओली र रमेश लेखकबीच चर्काचर्की भएको हो ।

उक्त बैठकमा अध्यक्ष ओलीले नेपाली कांग्रेसले सत्ता गठबन्धनभित्र चलखेल गर्न खोजेको आरोप लागाए । नेपाली कांग्रेसले प्रधानमन्त्री प्रचण्डलाई विश्वासको मत दिनुको पछाडी केही के केही स्वार्थ रहेको अध्यक्ष ओलीको भनाइ थियो ।

बैठकमा एमाले अध्यक्ष केपी शर्मा ओलीले सरकारलाई विश्वासको मत दिइसकेपछि कांग्रेसले आफूलाई प्रतिपक्ष भन्न नपाउने बताएका थिए ।

‘ तलदेखि माथिसम्म सत्ता गठबन्धनमा कसरी जाने भन्ने हाम्रो सहमति भइसकेको छ । तर सबैतिर विश्वासको मत दिइरहनु भएको छ । सत्ताको लागि नखेल्नुहोस् । तपाईँहरू त प्रतिपक्ष पनि बन्न सक्नुभएन ।’, बैठकमा ओलीले भनेका थिए ।

त्यसपछि कांग्रेस नेता लेखकले अध्यक्ष ओलीलाई जवाफ फर्काए । उनले नेपाली कांग्रेस प्रतिपक्षी दल भएको स्पष्ट पारे । उनले नेपाली कांग्रेसले हालको सत्ता गठबन्धनभित्र कुनै पनि चलखेल नगरेको बताए । ‘राष्ट्रपतिलाई बुझाएको पत्रमा हाम्रो हस्ताक्षर छैन । त्यसैले हामी प्रतिपक्ष नै हौँ । हामीले कुनै चलखेल गरेका छैनौँ ।’, उनले भने । त्यसपछि अध्यक्ष ओली बैठकबाट बाहिरिएका थिए ।

बैठकमा नेपाली कांग्रेस, नेकपा (एमाले), राष्ट्रिय स्वतन्त्र पार्टी (राप्रपा), जनमत पार्टी, नेकपा (एकीकृत समाजवादी) सहित सरकारलाई विश्वासको मत दिने दलका नेताहरू सहभागी थिए ।