काठमाडौं। नेपाली कांग्रेसका नेता गुरुराज घिमिरेलगायतको टोलीले पार्टी रुपान्तरणका लागि भन्दै २१ बुँदे सुझाव बुझाएका छन्। पार्टी सभापति शेरबहादुर देउवालाई बुझाउने भनिए पनि बुझ्न नमानेपछि पार्टी कार्यालयमा दर्ता गरिएको हो ।

घिमिरेसँगै केन्द्रीय सदस्य मधु आचार्यलगायत नेताहरुले चलाएको देशव्यापी कांग्रेस रूपान्तरण अभियानअनुसार अहिलेको घटनाक्रम र पार्टीलाई कसरी अघि बढाउने विषयमा नेतृत्वलाई २१ बुँदामा समेटेर सुझाव दिइएको छ ।

उक्त सुझावमा प्रतिनिधिसभा र प्रदेशसभा तथा उपनिर्वाचनमा प्राप्त अनपेक्षित परिणाम, भ्रष्टाचार प्रकरणहरूमा पार्टीका नेताहरूको संलग्नता, गठबन्धन सरकारलगायतका विषयमा उठेका प्रश्नहरु, असन्तुष्टिहरु समेटिएका छन् ।

यस्तै पार्टीमा देखिएको आन्तरिक अव्यवस्था, पार्टी सञ्चालन, समयसापेक्ष सुधार नगरी रूपान्तरणका आकांक्षा र आवश्यकतालाई समयमै सम्बोधन गरेर अघि नबढे कार्यकर्ताहरुमा झनझन् निराशा बढ्दै जाने तथा पार्टीको जनधार खस्किँदै गएको पनि सुझावमा उल्लेख छ ।