काठमाडौं। निर्वाचन आयोगले गत वर्षको प्रतिनिधिसभा तथा प्रदेशसभा निर्वाचनमा खर्च विवरण सार्वजनिक नगर्ने उम्मेदवारहरूलाई जरिवाना गर्ने निणर्य गरेको छ। आयोगले मंगलबार एक सूचना जारी गर्दै तोकिएको समयभित्र निर्वाचन खर्च विवरण नबुझाउने २ हजार ४ सय ३५ जना उम्मेदवारहरूलाई जरिवाना गर्ने निणर्य गरेको हो ।

आयोगले प्रतिनिधि सभातर्फका १ हजार ३७ जना र प्रदेश सभातर्फका १ हजार ३ सय ९८ गरी कुल २ हजार ४ सय ३५ जना उम्मेदवारहरूलाई जनही १५ हजार रुपैयाँका दरले जरिवाना गरेको हो । जरिवाना लागेका उम्मेदवारले ३५ दिनभित्र राजस्व दाखिला गरी सोको भौचर सहितको निवेदन निर्वाचन आयोग वा सम्बन्धित निर्वाचन कार्यालयमा पेश गर्न आदेश पनि दिइएको छ ।

खर्च विवरण नबुझाउनेहरूको सूचीमा नेपाली कांग्रेसका गगन थापा, राष्ट्रिय स्वतन्त्र पार्टीकी सोविता गौतम, माओवादी केन्द्रकी ओनसरी घर्तीसहितका सांसदहरूको नाम पनि उल्लेख छ ।

आयोगले जरिवाना बापतको रकम तोकिएको समयभित्र नबुझाउने उम्मेदवारहरूलाई तत्काल हुने एक निर्वाचनमा भाग लिन नपाउने गरी रोक लगाउने र जरिवाना बापतको रकम सरकारी बाँकी सरह असुल उपर गर्न केन्द्रीय तहसिल कार्यालयमा लेखी पठाउने निणर्य पनि गरेको छ । 

यस्तै, आयोगले खर्च विवरण बुझाउनेहरूको नामावली पनि सार्वजनिक गरेको छ । हालसम्म प्रतिनिधिसभाका २ हजार ३ सय ७३ जना र प्रदेशसभाका ५ हजार ५ सय ६१ जना उम्मेदवारले मात्रै खर्च विवरण बुझाएको आयोगले जनाएको छ ।

यस्तै आयोगले ७४ जना उम्मेदवारहरूसँग स्पष्टीकरण सोधेको छ । जसअन्तर्गत प्रतिनिधिसभा निर्वाचनका ३७ उम्मेदवार र प्रदेशसभा अन्तर्गत ३७ उम्मेदवारलाई स्पष्टीकरण सोधेको हो ।

हेर्नुस् आयोगले जरिवाना तोकेका प्रदेशतर्फका उम्मेदवार

हेर्नुस् आयोगले जरिवाना तोकेका  प्रतिनिधिसभातर्फका उम्मेदवार