काठमाडौं । अमेरिकी राष्ट्रपति डोनाल्ड ट्रम्पले गुगल र माइक्रोसफ्ट जस्ता ठूला टेक कम्पनीहरूलाई एक विशेष सन्देश दिएका छन्। ट्रम्पले कम्पनीहरूलाई भारतलगायत अन्य देशहरूमा महत्व दिएर काम नगर्न भनेका छन् ।

अमेरिकी राष्ट्रपति डोनाल्ड ट्रम्पले बुधबार वाशिंगटनमा आयोजित एआई शिखर सम्मेलनमा भाग लिएका थिए । शिखर सम्मेलनलाई सम्बोधन गर्दै राष्ट्रपति ट्रम्पले भनेका छन्, ‘अमेरिकी कम्पनीहरूले अब चीनमा कारखाना निर्माण गर्नु वा भारतबाट प्राविधिक कामदारहरू भर्ना गर्नुको सट्टा घरेलु रूपमा नयाँ रोजगारी सिर्जना गर्ने र प्रदान गर्ने कुरामा ध्यान केन्द्रित गर्नुपर्छ।’

कार्यक्रमलाई सम्बोधन गर्दै ट्रम्पले टेक उद्योगको विश्वव्यापी सोचको आलोचना गरे । ‘केही ठूला टेक कम्पनीहरूले अमेरिकाको स्वतन्त्रताको फाइदा उठाए र ठूलो नाफा कमाएका छन्, तर जब लगानीको कुरा आउँछ, उनीहरूको मुख्य रोजाइ अमेरिका बाहिरको देश हुन्छ, तर अब ती दिनहरू सकिएका छन्, अब राष्ट्रपति ट्रम्पको शासनकालमा यो हुने छैन’, ट्रम्पले अगाडि भनेका छन्, ‘हाम्रा ठूला प्राविधिक कम्पनीहरूले अमेरिकाको स्वतन्त्रताको फाइदा उठाए, तर चीनमा आफ्ना कारखानाहरू निर्माण गरे, भारतबाट कामदारहरू भर्ना गरे र आयरल्याण्डमा आफ्नो नाफा जम्मा गरे र यस समयमा उनीहरूले आफ्नै देशका नागरिकहरूलाई बेवास्ता गरे।’

उनले अमेरिकी सरकारको नीतिअनुसार काम गर्न कम्पनीहरूलाई आह्वान गरेका छन् । “आर्टिफिसियल इन्टेलिजेन्स ९एआई० को दौड जित्नको लागि, सिलिकन भ्याली र बाहिर देशभक्ति र देशप्रति वफादारीको भावना आवश्यक छ। हामीलाई त्यस्ता अमेरिकी प्राविधिक कम्पनीहरू चाहिन्छ जुन अमेरिकाप्रति पूर्ण रूपमा प्रतिबद्ध छन्। हामी चाहन्छौं कि तपाईंले अमेरिकालाई पहिलो स्थान दिनुहोस्। हामी यति मात्र चाहन्छौं’, उनले भनेका छन् ।

यद्दपि, यसअघि ट्रम्पले अमेरिकी कम्पनी एप्पल र गुगललगायतलाई भारतमा लगानी गर्न भनेका थिए । भारतसँगको दुरी बढाउँदै लगेका ट्रम्पले पछिल्लो अभिव्यक्ति दिएका हुन् । एजेन्सीबाट