काठमाडौं। अमेरिकी राष्ट्रपति डोनाल्ड ट्रम्प र जापानकी प्रधानमन्त्री साने ताकाइचीबीच आज दुईवटा महत्वपूर्ण द्विपक्षीय सम्झौता सम्पन्न भएका छन्। तीमध्ये एक सम्झौता व्यापारसँग सम्बन्धित छ भने अर्को दुर्लभ र महत्वपूर्ण खनिजको आपूर्ति सुदृढ गर्न केन्द्रित छ।

यी सम्झौताहरू सोमबार टोकियोको आकासाका प्यालेसमा भएको ट्रम्प र ताकाइचीबीचको द्विपक्षीय बैठकपछि हस्ताक्षर गरिएको हो। जापानी सञ्चारमाध्यमले उक्त बैठकले दुवै देशबीचको रणनीतिक र आर्थिक साझेदारीलाई थप बलियो बनाएको जनाएका छन्।

पहिलो सम्झौतामा ‘अमेरिका–जापान गठबन्धनको नयाँ सुनौलो युग’ को घोषणा गरिएको छ। यसअनुसार जापानी लगानीकर्ताले अमेरिकामा करिब ५५० अर्ब अमेरिकी डलर बराबरको लगानी गर्नेछन्, जसको बदलामा अमेरिकी पक्षले जापानी निर्यातमा १५ प्रतिशत कर लागू गर्ने व्यवस्था गरेको छ। दोस्रो सम्झौताले दुर्लभ र महत्वपूर्ण खनिजको खानी र प्रशोधन क्षेत्रमा सहकार्य बढाउने ढाँचा तयार गरेको छ, जसको उद्देश्य अत्यावश्यक सामग्रीको आपूर्ति शृंखलालाई मजबुत बनाउँदै इलेक्ट्रोनिक्स र प्रविधि उत्पादनमा आवश्यक कच्चा पदार्थको उपलब्धता सुनिश्चित गर्नु हो।

सम्झौता हस्ताक्षरपछि आकासाका प्यालेसमा स्वागत समारोह आयोजना गरिएको थियो, जहाँ ट्रम्प र ताकाइचीले सम्मान गार्ड अवलोकन गर्दै अधिकारीहरूसँग भेटघाट गरेका थिए। समारोहले वाशिङ्टन र टोकियोबीच बढ्दो मित्रता र सहकार्यलाई प्रतीकात्मक रूपमा झल्काएको थियो। कार्यक्रममा अमेरिकी विदेश मन्त्री मार्को रुबियो, कोष मन्त्री स्कट बेसन्ट, वाणिज्य मन्त्री हावर्ड लुटनिक लगायतका उच्च अधिकारीहरू सहभागी थिए।

ट्रम्पको जापान भ्रमण उनले सोमबार सम्राट नारुहितोसँग गरेको भेटपछि सुरु भएको हो। सो अवसरमा उनले सम्राटलाई ुमहान व्यक्तिु भन्दै सम्मान व्यक्त गरेका थिए। ट्रम्पको यो भ्रमण पाँच दिने एसियाली दौराअन्तर्गतको दोस्रो गन्तव्य हो। यसअघि उनले मलेसियामा सम्पन्न ४७औँ आसियान शिखर सम्मेलनमा सहभागी हुँदै क्याम्बोडिया–थाइल्यान्ड शान्ति सम्झौतामा हस्ताक्षर गरेका थिए।