काठमाडौं । नेकपा एमालेका अध्यक्ष केपी शर्मा ओलीले प्रतिनिधि सभा पुनर्स्थापना नभएसम्म पार्टीको जनप्रदर्शन नरोकिने बताएका छन् ।

आइतबार प्रेस चौतारी नेपालसँग आबद्ध पत्रकारहरूसँग आफ्नै निवास गुण्डुमा कुराकानी गर्दै अध्यक्ष ओलीले प्रदर्शन अझ सशक्त रूपमा अघि बढ्ने बताएका छन् । उनले भने, ‘हामीले जनप्रदर्शन सुरु गरेका छौँ, यो रोकिनेवाला छैन, अझ बढ्दै जान्छ ।’ उनले वर्तमान सरकारले जनप्रतिनिधि वा संविधानप्रति कुनै उत्तरदायित्व नराखेको बताएका छन् ।

अहिलेको सरकार असंवैधानिक भएको उनको भनाइ छ । उनले भने, ‘यो सरकार असंवैधानिक सरकार हो, यो कसैप्रति उत्तरदायी छैन, यसलाई कसैले चिन्दैन, त्यसैले यस्तो सरकार हट्नुपर्छ ।’ उनले प्रतिनिधि सभा पुनर्स्थापनाको मागसहित सुरु गरिएको एमालेको जनप्रदर्शन नरोकिने बताएका छन् । अध्यक्ष ओलीले भने, ‘प्रतिनिधि सभा पुनर्स्थापना नभएसम्म यो आन्दोलन रोकिन्न, यो अझ फैलिँदै जान्छ, रोकिनेवाला छैन् ।’

अध्यक्ष ओलीले एमालेले कहिल्यै चुनावबाट पछि नहट्ने स्पष्ट गर्दै अहिलेको अवैधानिक सरकार लाई चुनाव गराउने अधिकार नै नभएको बताएका छन् । उनले भने, ‘एमाले चुनावबाट भाग्दैन तर यो अवैधानिक सरकारलाई देशमा चुनाव गराउने हक छैन, त्यसैले विघटित प्रतिनिधि सभा शीघ्र पुनर्स्थापित हुनुपर्छ ।’