काठमाडौं । नेपाली कांग्रेसका उपसभापति विश्वप्रकाश शर्माले कुनै पनि व्यक्ति सत्तामा निरन्तर आसन जमाउने परम्परा भत्काउने बताएका छन् ।

सोमबार लमजुङको कांग्रेस जिल्ला कार्यालय भवन उद्घाटन र विश्वेश्वरप्रसाद कोइरालाको सालिक अनावरण कार्यक्रममा उपसभापति शर्माले आफूहरूले आसन, भाषण र शासनमा सुधार गर्ने बताएका छन् । उनले भने, ‘बदलिएको काँग्रेसले अब देशको आसन, भाषण र शासनमा सुधार गर्नेछ । कुनै पनि व्यक्ति सत्तामा निरन्तर आसन जमाउने परम्परा भत्काएर, हामी १, २, ३ र ४ को नीति संविधानमा अङ्कित गर्नेछौँ, अब उप्रान्त कोही पनि प्रधानमन्त्री र मुख्य मन्त्री दुई पटक भन्दा बढी रहन पाउने छैनन् ।’

उनले पार्टीका नेता कार्यकर्तालाई चुनावी मैदानमा गाली होइन प्रेम सम्प्रेषण गर्न आग्रह गरे । स्वस्थ आलोचना स्वाभाविक हुने तर आपसलाई गाली गरेर राजनीतिलाई स्वस्थ बनाउन नसकिने तथा चुनाव जित्ने नाममा जे पनि आश्वासन दिएर, समाजमा भोलि निराशा जगाउने कार्य कांग्रेसले भाषण र घोषणा पत्रमार्फत नगर्ने शर्माले बताए । जेनजी विद्रोहको भावनाबमोजिम शासनमा सुधार गर्ने उपसभापति शर्माले बताए ।

उपसभापति शर्माले भने, ‘देशको शासनमा जेजस्तो सुधार गर्न जरुरी छ । त्यसको केस्राकेस्रा केलाएका छौँ, हामीले जेनजी विद्रोहको भावना बमोजिम त्यो सुधार, परिमार्जन र समग्रमा परिवर्तनलाई हामी सम्भव बनाउने छौँ ।’