काठमाडौ । गर्मी मौसमको सुरुवातसँगै बजारमा जताततै हरिया र रसिला खरबुजाहरू देखिन थालेका छन्। टन्टलापुर घाम र बढ्दो तापक्रमबाट राहत पाउन मात्र नभई स्वास्थ्यका दृष्टिले पनि खरबुजा यो मौसमको सर्वश्रेष्ठ फल मानिन्छ।

पानीको मुख्य स्रोत र हाइड्रेशन
खरबुजामा करिब ९२ प्रतिशत पानीको मात्रा हुन्छ । गर्मीमा शरीरबाट पसिनाका माध्यमले प्रशस्त पानी बाहिरिने हुँदा डिहाइड्रेशन (जलवियोजन) को जोखिम उच्च हुन्छ । यस्तो अवस्थामा खरबुजाको सेवनले शरीरमा पानीको आपूर्ति गरी शीतलता प्रदान गर्छ ।

पोषक तत्वको भण्डार
यसमा भिटामिन ए, सी र बी–६ का साथै पोटासियम र म्याग्नेसियम जस्ता खनिज तत्वहरू पाइन्छन्। विशेषगरी यसमा पाइने लाइकोपीन नामक एन्टिअक्सिडेन्टले छालालाई सूर्यको हानिकारक पराबैजनी किरणबाट जोगाउन मद्दत गर्छ।

स्वास्थ्यका अन्य फाइदाहरूः

हृदय स्वास्थ्यः यसले कोलेस्ट्रोल नियन्त्रण गर्न र रक्तचाप सन्तुलनमा राख्न सहयोग पुयाउँछ।

पाचन प्रणालीः प्रशस्त फाइबर र पानी हुने भएकाले यसले कब्जियतको समस्या कम गरी पाचन प्रक्रियालाई सहज बनाउँछ।

तौल नियन्त्रणः कम क्यालोरी हुने भएकाले तौल घटाउन चाहनेहरूका लागि यो उत्तम विकल्प हो।

मांशपेसीको आरामः यसमा हुने ’सिट्रुलिन’ नामक एमिनो एसिडले व्यायामपछिको मांशपेसीको दुखाइ कम गर्छ।

तसर्थ, गर्मीको रापबाट बच्न र शरीरलाई स्फूर्त राख्न दैनिक खानपानमा खरबुजा समावेश गर्नु बुद्धिमानी देखिन्छ। तर, बजारमा पाइने अत्यधिक रसायन प्रयोग गरिएका वा धेरै समयसम्म काटेर राखिएका खरबुजा खानुअघि भने सचेत हुन जरुरी छ।