वासिङ्टन/तेहरान। पछिल्लो १२ घण्टामा अमेरिका र इरानबीचको कूटनीतिक संवाद निकै उतारचढावपूर्ण मोडमा पुगेको छ।

हर्मोज जलडमरू मा अमेरिकी सेनाले इरानी मिसाइल लन्चर र माइन बिछ्याउने डुङ्गाहरूलाई लक्षित गरी गरेको हवाई आक्रमणका बाबजुद दुवै देश कतार र पाकिस्तानको मध्यस्थतामा भइरहेको शान्ति वार्ताबाट बाहिरिएका छैनन्।

इरानी विदेश मन्त्रालयले अमेरिकी सैन्य कारबाहीको निन्दा गर्दै यसलाई हालै भएको युद्धविरामको "गम्भीर उल्लङ्घन" र "धोखाधडी" को संज्ञा दिएको छ। सो आक्रमणमा चार इरानी सैनिक मारिएका छन्।

यद्यपि, इरानले तत्काल कुनै सैन्य प्रतिशोधको घोषणा नगर्नुले वार्तालाई निष्कर्षमा पुर्‍याउने उसको चाहना प्रस्ट पारेको छ।

कूटनीतिक स्रोतका अनुसार दुवै पक्ष हाल १४ बुँदे समझदारी पत्रलाई अन्तिम रूप दिन प्रयासरत छन्। यस अन्तर्गत ६० दिनको अस्थायी युद्धविराम थप गर्ने, हर्मोज जलडमरूलाई व्यापारिक जहाजका लागि खुला गर्ने र इरानको संवर्धित युरेनियम भण्डार तथा रोक्का गरिएको २४ अर्ब डलरको कोष फुकुवा गर्ने जस्ता संवेदनशील विषयमा छलफल भइरहेको छ।

इरानी वार्ता टोलीका प्रवक्ता इस्माइल बगाइले सञ्चारमाध्यमलाई प्रतिक्रिया दिँदै भनेका छन्, "सम्झौता निकै नजिक पनि छ र धेरै टाढा पनि।" उता अमेरिकी विदेशमन्त्री मार्को रुबियोले केही प्रगति भएको स्वीकार गरे पनि तत्कालै निर्णायक सहमति भइहाल्नेमा संशय व्यक्त गरेका छन्।

यसैबीच, अमेरिकी राष्ट्रपति डोनाल्ड ट्रम्पले वार्ताको समीक्षाका लागि क्याम्प डेभिडमा बोलाउनुभएको मन्त्रिपरिषद् बैठक खराब मौसमका कारण स्थगित भएको छ।

अन्तर्राष्ट्रिय बजारमा यो सैन्य तनाव र वार्ताको अनिश्चितताका कारण ब्रेन्ट क्रुड तेलको मूल्यमा करिब ४ प्रतिशतको वृद्धि देखिएको छ। क्षेत्रीय नेताहरूले भने विश्वव्यापी ऊर्जा सङ्कट टार्न अमेरिकालाई सम्झौता स्वीकार गर्न दबाब दिइरहेका छन्।