लमजुङ।अघिल्लो वर्षसम्म बर्खामा हिलो र हिउँदमा धुलोका कारण सास्ती खेप्दै आएको दोर्दी गाउँपालिका जोड्ने सडक अहिले कालोपत्र भएपछि तिमीलाई यात्रा गर्न निकै सहज भएको छ।

उदिपुर–रिठ्ठेबगर–नौथर हुँदै दोर्दी गाउँपालिका केन्द्र जोड्ने ७।१ किलोमिटर सडक ‘एक पालिका, एक सडक’ अभियानअन्तर्गत कालोपत्र भएपछि यस वर्षको बर्खायाममा पनि सवारीसाधन बिना अवरोध सञ्चालन भइरहेका छन्। यसले बेँसीसहर र दोर्दीबीचको यात्रा छोटो, सुरक्षित र सहज बनाएको छ।

पहिले वर्षामा सडक हिलाम्मे हुने, गाडी चिप्लिने, हिलोमा फस्ने र यात्रा गर्न घण्टौँ लाग्ने समस्या थियो। हिउँदमा भने धुलोले स्थानीय बासिन्दा, यात्रु र सडक आसपासका बस्ती प्रभावित हुने गर्थे। अहिले अस्फाल्ट कालोपत्र भएपछि यी समस्या धेरै हदसम्म हटेका छन्।

दोर्दी गाउँपालिका–४ का स्थानीय लक्ष्मण गुरुङका अनुसार अहिले मोटरसाइकल तथा साना सवारीसाधनबाट उदिपुरदेखि दोर्दीसम्म १५–२० मिनेटमै पुग्न सकिन्छ। पहिले भने बर्खामा जोखिम मोलेर यात्रा गर्नुपर्ने अवस्था थियो।

यस्तै, बेँसीसहर नगरपालिका–११ का ईश्वरराज सेढाईले पनि सडक राम्रो भएपछि दैनिक आवतजावतमा ठूलो सहजता आएको बताए। उनका अनुसार पहिले एउटा काम गर्नै धेरै समय लाग्थ्यो भने अहिले छोटो समयमै गएर फर्किन सकिन्छ। सडक सहज बनेपछि कृषि उत्पादन बजारसम्म पुर्‍याउन, आवश्यक सामग्री ल्याउन र सदरमुकाम पुग्न पनि सजिलो भएको छ।

दोर्दी गाउँपालिका अध्यक्ष युवराज अधिकारीले पालिका केन्द्र जोड्ने मुख्य सडक कालोपत्र भएपछि स्थानीयलाई ठूलो राहत पुगेको बताए। उनका अनुसार यसले यात्रा सुरक्षित बनाउनुका साथै शिक्षा, स्वास्थ्य, कृषि र खानेपानीजस्ता क्षेत्रमा पनि सकारात्मक प्रभाव पारेको छ।

पूर्वाधार विकास कार्यालय लमजुङका सूचना अधिकारी नरेशराज जोशीका अनुसार गत मङ्सिरको अन्तिमतिर सडकको कालोपत्र सम्पन्न भएको हो। प्रदेश सरकारको २६ करोड २९ लाख रुपैयाँ लगानीमा निर्माण भएको यो सडकको ठेक्का कन्टेक निर्माण प्रालिले पाएको थियो। २०७७ असार ३ गते सम्झौता भए पनि कोभिड–१९ लगायतका कारण निर्माण ढिलो भएको थियो। पछि थपिएको समयभित्र काम सम्पन्न गरी सडक सञ्चालनमा ल्याइएको हो।

सडकमा अस्फाल्ट कालोपत्रसँगै आवश्यक स्थानमा ढलान, नाला तथा अन्य संरचना पनि निर्माण गरिएका छन्। अहिले यो सडक सञ्चालनमा आएपछि दोर्दी गाउँपालिकाका बासिन्दाको दैनिक आवतजावत, कृषि उपज ढुवानी, शिक्षा र स्वास्थ्य सेवामा पहुँच थप सहज बनेको छ।