काठमाडौं । बिहान उठ्नेबित्तिकै तातो चियाको चुस्की लिनु धेरै मानिसको दैनिक बानी हुन्छ। अझ धेरैजसो नेपालीहरूको घरमा दूध र चिनी मिसाइएको ‘दूधे चिया’ बिना बिहानको सुरुवात नै हुँदैन। तर, के तपाईंलाई थाहा छ? खाली पेटमा दूध हालेको चिया पिउनु स्वास्थ्यका लागि निकै हानिकारक मानिन्छ।

स्वास्थ्य विज्ञ तथा आहारविद्हरूका अनुसार, खाली पेटमा दूध चिया पिउँदा शरीरमा विभिन्न किसिमका स्वास्थ्य समस्याहरू उत्पन्न हुन सक्छन्। यस विषयमा गरिएको एक विशेष रिपोर्ट यहाँ प्रस्तुत छः

खाली पेटमा दूध चिया पिउँदा देखिने प्रमुख समस्याहरूः
एसिडिटी (अम्लीयपन) र छाती पोल्ने समस्याः
चियाको पातमा क्याफिन र टानिन जस्ता तत्व पाइन्छन्। जब खाली पेटमा दूध चिया पिइन्छ, तब पेटमा एसिडको मात्रा अत्यधिक रूपमा बढ्छ। यसले ग्यास्ट्रिक, एसिडिटी र छाती पोल्ने जस्ता समस्या निम्त्याउँछ।

पोषक तत्वको शोषणमा बाधाः
दूधमा पाइने क्याल्सियम र प्रोटीन शरीरले पूर्ण रूपमा पाउनुपर्ने हुन्छ। तर, चियामा पाइने ’टानिन’ नामक तत्वले शरीरलाई खानाबाट आयरन (फलाम) र अन्य महत्वपूर्ण पोषक तत्वहरू शोषण गर्न बाधा पु¥याउँछ। जसले गर्दा शरीरमा रगतको कमी ( एनिमिया) हुन सक्छ।

सुस्ती र ऊर्जामा कमीः
धेरैजसो मानिसहरू चियाले तत्काल ऊर्जा दिन्छ भनेर पिउने गर्छन्। तर, खाली पेटमा चिया पिउँदा यसले रगतमा चिनीको मात्रालाई असन्तुलित बनाउँछ। यसले गर्दा केही समयका लागि स्फूर्ति मिले जस्तो भए पनि पछि अत्यधिक थकान, अल्छीपना र सुस्ती महसुस हुन्छ ।

पाचन प्रणालीमा गडबडीः
बिहान खाली पेटमा दूध र चियाको मिश्रण पेटमा पर्दा पाचन प्रक्रिया सुस्त हुन्छ। यसले गर्दा पेट फुल्ने, अपच हुने, कब्जियत र ग्यास भरिने जस्ता दीर्घकालीन पाचनसम्बन्धी समस्याहरू देखा पर्न सक्छन्।

बिहान उठ्नेबित्तिकै चिया खानै पर्ने बानी छ भने दूध र चिनी नहालेको ब्ल्याक टी (कालो चिया), ग्रीन टी वा कागती पानी पिउनु लाभदायक हुन्छ।दूध चिया पिउने नै भए, खाली पेटमा कहिल्यै नपिउनुहोस्। चिया पिउनुअघि केही हलुका खाजा (जस्तैः बिस्कुट, ड्राइ फ्रुट्स वा फलफूल) अनिवार्य रूपमा खानुहोस्।

तसर्थ, आजैदेखि आफ्नो खानपानको बानीमा सुधार ल्याउनुहोस् र खाली पेटमा दूध चिया पिउने बानीलाई त्यागेर स्वस्थ्य जीवनशैली अपनाउनुहोस्।