काठमाडौं । सरकारले सहमतिको आधारमा संविधान संशोधन प्रक्रिया अगाडि बढाउने भएको छ ।

प्रतिनिधिसभा र राष्ट्रिय सभाको संयुक्त बैठकमा सरकारले ल्याएको आगामी आर्थिक वर्षको नीति तथा कार्यक्रम बाचन गर्दै राष्ट्रपति रामचन्द्र पौडेलले यस्तो बताएका हुन् । उनले २०७२ सालमा जारी भएको संविधान समीक्षा गर्दै कार्यान्वयनको क्रममा देखिएका कमजोरी सच्याउँदै जाने बताएका छन् ।

नीति तथा कार्यक्रममार्फत सरकारले सहमतिकै आधारमा संविधान संशोधन प्रक्रिया अगाडि बढाउने स्पष्ट पारेको छ । राष्ट्रपतिले भने, ‘सरकारले संविधानको समीक्षा गर्दै कार्यान्वयनको क्रममा देखिएका कमी-कमजोरी सच्याउन सहमतिको आधारमा संशोधनको प्रक्रिया आगाडि बढाउनेछ, ।’

नेपाली कांग्रेस र नेकपा एमालेबीच वर्तमान सत्तागठबन्धन बनाउने क्रममा गरिएको सातबुँदे सहमतिको एक बुँदामा संविधान संशोधन गर्ने उल्लेख छ । तर, अहिलेसम्म संविधान संशोधनको प्रक्रिया अगाडि बढेको छैन ।