विषयगत समितिमा सदस्य हेरफेर र प्रधानमन्त्रीको कार्यालयबाट प्राप्त कार्यभार सम्बन्धी पत्रको ब्यहोरा सभामुख देवराज घिमिरेले जानकारी गराउने सम्भावित कार्यसूचीमा उल्लेख छ ।

तर विपक्षी दलहरूले गृहमन्त्री रमेश लेखकको राजीनामा र भिजिट भिसा प्रकरणको छानबिनको लागि संसदीय समिति गठनको माग राख्दै संसद् अवरोध गर्दै आएकोले बिहीबारको बैठक कार्यसूचीमा प्रवेश गर्न पाउनेमा आशङ्का भने कायमै छ ।

विपक्षी दलहरूले संसद सुचारु गर्न तीनवटा सर्त राखेका छन् । सो सर्तबाट विपक्षीहरू पछि हटेका छैनन् । विपक्षीले भिजिट भिसा प्रकरणबारे छानबिन गर्न छानबिन आयोग बनाउने विषयलाई पहिलो सर्त बनाएका छन् ।

यस्तै, भिजिट भिसा प्रकरणको छानबिन गर्न गृहमन्त्री लेखकले छानबिनको परिणाम नआएसम्म राजीनामा दिएर अनुसन्धानका लागि सहयोग गर्नुपर्ने दोस्रो सर्त छ भने भिजिट भिसा प्रकरणको जिम्मेवारी लिन र छानिबन गराउने प्रतिबद्धता प्रधानमन्त्री केपी शर्मा ओलीले सदनमा जनाउनुपर्नेछ ।

संसद सुचारु गराउन सत्तापक्ष र विपक्षीसँग मध्यस्थता गर्दै अग्रसरता लिइरहेका सभामुख देवराज घिमिरेको प्रयास पनि सफल हुन सकेको छैन । उनले मंगलबार र बुधबार दलहरूका प्रमुख सचेतकहरूसँग छलफल गरेका थिए ।