निश्चल बस्नेतदेखि ऋचा शर्मासम्मले प्रधानमन्त्रीलाई भने- सरकारले खुट्टा दह्रो टेकोस्, साथमा हामी छौँ

शैली न्युज

बुधवार , कार्तिक ५, २०८२

निश्चल बस्नेतदेखि ऋचा शर्मासम्मले प्रधानमन्त्रीलाई भने- सरकारले खुट्टा दह्रो टेकोस्, साथमा हामी छौँ

काठमाडौँ । प्रधानमन्त्री सुशीला कार्कीसँऊ कलाकारहरूको एक समूहले भेट गरेको छ। बुधबार बालुटारस्थित प्रधानमन्त्रीको निवासमा भएको भेटमा उनीहरूले कुसूचना र प्रोपोगान्डाबाट नडराइ आफ्नो संकल्पअनुसार अघि बढ्न भनेका हुन्।

समकालीन नेपाली सिनेमाका चर्चित ९ जना कलाकारले प्रधानमन्त्री कार्कीलाई भ्रष्टाचारविरुद्धको कारबाही र आगामी निर्वाचनलाई अर्जुनदृष्टि बनाएर अघि बढ्न आग्रह गरे।

‘सरकारसँग हामी केही माग्न आएका होइनौँ,’ उनीहरूको भनाइ थियो, ‘यो देश रहेमा माग्ने कुरा माग्दै गरौँला। पहिला यो देश बचोस्। देश बस्नलायक होस्। यसका लागि सरकारले दह्रो खुट्टा टेकेर अघि बढोस्। हामी साथमा छौँ।’

उनीहरूले देशमा अब के हुन्छ भनेर डर लागिरहेको बेलामा सम्हाल्न आमा आएको भन्दै साथमा आफूहरू भएको बताएका थिए। ‘अब के पो हुन्छ भनेर हामीलाई डर लागिरहेका बेला सम्हाल्न आमा आउनुभएको छ,’ अभिनेत्री ऋचा शर्माले भनिन् ‘हामीलाई ढुक्क भएको छ। यहाँको सरल, सादगीपूर्ण र स्पष्टवक्ता शैलीका कारण पनि भरोसा जागेको छ। अब मुलुक ठिक दिशामा अघि बढ्नेछ। यहाँहरू अविचलित रही अघि बढ्नुहोस्, हामी साथमा हामी छौँ।’

प्रतिक्रिया