काठमाडौं । नेपाली कांग्रेसको विशेष महाधिवेशन पक्षधरले हामीले चुनावअघिको शक्ति–व्यवस्था होइन, नयाँ नीति र नयाँ नेतृत्व खोजेको बताएको छ ।

आज बिहीबार पत्रकार सम्मेलन गर्दै पार्टीको संरचनागत सुधार गर्ने गरी चुनावमा जाने नेतृत्व खोज्दा डेढ महिनादेखि निर्णय गर्न नसकेको भन्दै उनीहरूले प्रश्न गरेका हुन् । विशेष महाधिवेशनको मुद्दालाई कमजोर बनाउने नियतसहित आउने नियमित महाधिवेशनको कार्यतालिकामा सहमत हुन नसकिने विशेष महाधिवेशन पक्षधरहरूले जनाएका छन् ।

विशेष महाधिवेशन पक्षधरले निकालेको वक्तव्यमा भनिएको छ, ‘कुनै पनि बाहना वा अविश्वसनीय नियमित महाधिबेसनको तालिकामा विशेष महाधिबेसनको माग निष्क्रिय हुन सक्दैन् । वर्तमान कार्यसमितिको समयावधि थप नगरी नियमित महाधिवेशन सम्पन्न भई नयाँ नेतृत्व निर्वाचित हुने भएमा मात्र विशेष महाधिवेशनको माग स्वतः निष्क्रिय हुनेछ । अन्यथा, पार्टी विधानले दिएको वैधानिक अधिकार-विशेष महाधिवेशन-कसैले पनि रोक्न वा अतिक्रमण गर्न पाउँदैन ।’

विशेष महाधिवेशन पक्षधरले महाधिवेशनको कार्यतालिका मागेका नभई महाधिवेशनको सुनिश्चिता खोजेको वक्तव्यमा उल्लेख गरिएको छ । विज्ञप्तिमा भनिएको छ, ‘हामीले चुनावअघिको शक्ति–व्यवस्था होइन, नयाँ नीति र नयाँ नेतृत्व खोजेका हौ ।’ विधानको व्यवस्था अनुसार माग भएको विशेष महाधिवेशनबाट पछि नहट्ने प्रस्तावकर्ताहरुको अडान छ । विशेष महाधिवेशनको प्रस्ताव दर्ता भएको मितिले तीन महिनाभित्र आह्वान गर्नुपर्ने वाध्यात्मक अवस्था रहेको विज्ञप्तिमा उल्लेख गरिएको छ ।

विधान केन्द्रीय कार्यसमितिका लागि पनि समान रूपमा लागू हुन्छ कि हुँदैन ? देश, लोकतन्त्र र पार्टीको हित सर्वोपरी हो कि व्यक्तिगत आकांक्षा र स्वार्थ ?’ नेतृत्वलाई प्रश्न गरिएको छ । कांग्रेसको आन्तरिक जीवन र महाधिवेशन प्रक्रियामा देखिएको लामो अन्योल र निर्णयहिनताले पार्टी आज गम्भीर संकटको मोडमा उभिएको उल्लेख गर्दै यसको जिम्मेवारी वर्तमान केन्द्रीय नेतृत्वले लिनुपर्ने वब्तव्यमा भनिएको छ ।

करिव ५५ प्रतिशत महाधिवेशन प्रतिनिधिहरूले पार्टी विधानअनुसार वैधानिक रूपमा अघि सारेको मागलाई नेतृत्वले बेवास्ता गरेको भन्दै दुःख व्यक्त गरिएको छ ।

वक्तव्यमा भनिएको छ, ‘नियमित महाधिवेशनको मिति तोक्न समेत आनाकानी गर्ने, विशेष महाधिवेशनको मागलाई सम्बोधन नगरी केन्द्रीय समितिको बैठकलाई अनावश्यक रूपमा लम्ब्याइरहने प्रवृत्ति कुनै पनि हिसाबले जिम्मेवार नेतृत्वको परिचय होइन ।’