काठमाडौँ । प्रतिनिधिसभा निर्वाचनका लागि कैलाली निर्वाचन क्षेत्र नम्बर १ बाट उम्मेदवारी दिएका नागरिक उन्मुक्ति पार्टी नेपालका संरक्षक रेशमलाल चौधरीको उम्मेदवारी खारेज भएको छ। निर्वाचन अधिकृतको कार्यालयले मंगलबार उनको उम्मेदवारी बदर गर्ने निर्णय गरेको हो।

टीकापुर हत्याकाण्डमा दोषी ठहर भई जन्मकैदको सजाय काटेका र पछि राष्ट्रपतिबाट आममाफी पाएका चौधरीको उम्मेदवारीका विरुद्धमा उजुरी परेपछि निर्वाचन अधिकृतको कार्यालयले कानुनी प्रावधानलाई टेक्दै यस्तो फैसला सुनाएको हो।

आफ्ना प्रमुख नेताकै उम्मेदवारी खारेज भएपछि नागरिक उन्मुक्ति पार्टीलाई ठूलो राजनीतिक धक्का लागेको छ। सुदूरपश्चिमको राजनीतिमा बलियो पकड बनाउँदै गएको यो पार्टीले कैलाली १ मा रेशम चौधरीलाई नै मुख्य खम्बाका रूपमा प्रस्तुत गरेको थियो।